Fyrir höfunda

Ritröð Guðfræðistofnunar

Leiðbeiningar til höfunda um frágang greina
Endurskoðaðar í apríl 2023

Umfang og markmið
Í Ritröðinni eru birtar greinar, ritdómar og fyrirlestrar á fræðasviðum guðfræði og almennra trúarbragðafræða. Einnig eru þar birtar greinar af öðrum fræðasviðum sem snerta ofangreind svið eða ritnefnd metur hverju sinni áhugaverðar. Miðað er við að greinar séu u.þ.b. 6000 orð að lengd.

Ritrýniferli
Allar innsendar greinar gangast undir nafnlausa ritrýni tveggja sérfræðinga á viðkomandi sviði. Í ljósi hennar ákveður ritnefnd hvort grein skuli tekin til birtingar en veitir höfundi að öðrum kosti rökstuðning um höfnun eða gefur ábendingar um breytingar. Höfundum ber að bregðast við ritrýni áður en til birtingar kemur.
Almennt skal vísa til heimilda og hjálpargagna í greinum sem birtar eru í Ritröðinni. Við frágang tilvísana skal farið að meðfylgjandi reglum Ritraðarinnar.

Titill og undirtitill
Afmarka skal undirtitil frá (aðal)titli. Alla jafna skal forðast að nota fleiri undirtitla en einn. Í tilvísunum skal afmarka undirtitil frá aðaltitli með tvípunkti og séu undirtitlar tveir eða fleiri skal koma þankastrik milli fyrri og seinni undirtitils (-titla).
Dæmi:
Hjalti Hugason, „Aðskilnaður ríkis og kirkju: Upphaf almennrar umræðu 1878–1915 — Síðari grein“, Ritröð Guðfræðistofnunar 48/2019, bls. 25–60.
Höfundar skulu láta þýðingu titils og undirtitils á ensku fylgja með greininni (sjá um útdrátt neðar á blaðsíðunni).

Kaflar/undirkaflar
Kaflaheiti í greinunum sjálfum skulu vera feitletruð. Að öllu jöfnu skulu ekki hafðir undirkaflar nema í mjög löngum greinum og þá eru undirkaflaheiti skáletruð (án feitleturs).

Útdráttur/abstract
Útdráttur á íslensku og ensku skal fylgja hverri grein, hvor u.þ.b. ½ til 1 bls. að lengd. Titill greinarinnar skal þýddur á ensku með útdrættinum.

Efnisorð/keywords
Efnisorð, gjarnan 6–8 talsins, á íslensku og ensku, skulu fylgja útdráttum.